Əkbər Qoşalı. Yolunu azarsan yol səni səslər

yolunu azarsan yol səni səslər,
nəsə itirərsən ol səni səslər
hər səsi çevirib söz etmək olmur
qəlb kədəri gəzər, dil qəmi səslər.

eyni yerdən gələr, başqadı adı,
başqadı səs dadı, başqa söz dadı,
səslərin gözəli qara sazdadı
Kərəmi çağırar, Dilqəmi səslər.

deyir, söz ölməyir, deyir, səs ölmür.
bəs öləndən sonra nə üçün gəlmir?-
gəlməyinə gəlir e,
eşidilməyir,
yoxsa keçəmməyir kəfəni səslər?!.

04.10.2007, Masallı