.
REAL Hərəkatının həbsdə olan sədri İlqar Məmmədov hücuma məruz qalıb. Bu haqda AzadlıqRadiosuna REAL-ın icra katibi Natiq Cəfərli məlumat verib. Onun sözlərinə görə, hadisə dünən – iyulun 29-da axşam saat təxminən 9-da baş verib:
“Dustaqlar həyətdə gəzərkən bir nəfər İlqar Məmmədova hücum edib. Ona bir neçə zərbə endirib. Ölkədə vəziyyətin yaxşı olduğunu, niyə İlqar Məmmədovun bununla razılaşmadığını bildirib. İlqar bəy bunun təxribat olduğunu anlayıb. Digər dustaqlar onları ayırıblar”.
Natiq Cəfərli bildirib ki, İlqar Məmmədova qarşı edilən təzyiqlər aylardır davam edir və burada məqsəd ona zorla əfv ərizəsi yazdırmaqdır.
İyulun 30-da səhər vəkil Fuad Ağayev İlqar Məmmədovla görüşüb. Vəkil hadisə ilə bağlı hüquq mühafizə orqanlarına, Qırmızı Xaç Komitəsinə və digər beynəlxalq təşkilatları müraciət ediləcək.
Respublikaçı Alternativ Hərəkatının bununla bağlı bəyanat yayıb. Həmin bəyanatda deyilir ki, iqtidar Avropa Məhkəməsi, Avropa Şurasının Nazirlər Komitəsinin İlqar Məmmədovun azadlığa buraxılması ilə bağlı qətnamələrini icra etmək yerinə, ona əfv ərizəsi yazdırmaq cəhdlərindən əl çəkmir:
“Bu cəhdlər yumşaq danışıqlar, təklif və şirnikləndirmələr, böhtan və təhdidlər, ünsiyyətdən kəsmək, birnəfərlik cəza otağına salmağa qədər müxtəlif formalarda olub. Lakin son vaxtlar bu cəhdlərin sırasına fiziki hücumlar, təhdidlər də əlavə edilib”.
Hərəkat onun sədrinə, eləcə də digər üzvlərinə qarşı baş verə biləcək bütün hadisələrə görə bir başa hökumətin məsuliyyət daşıdığını bildirir.
Hələlik bu hadisə ilə bağlı Penitensiar Xidmətdən hər hansı açıqlama verilməyib.
İlqar Məmmədov 2013-cu il fevralın 4-dən həbsdədir. O, həmin il yanvarın 23-24-də İsmayıllıda baş vermiş hadisələrə görə həbs olunub, 7 il müddətinə azadlıqdan məhrum edilib.
2014-cü ilin may ayında Avropa İnsan Hüquqları Məhkəməsi İlqar Məmmədovun azadlıq hüququnun və təqsirsizlik prezumpsiyasının pozulmasını tanıyıb. Məhkəmənin qərarına əsasən, Azərbaycan dövləti dəymiş mənəvi ziyana görə İlqar Məmmədova 22 min avro təzminat ödəməlidir.
