Cənab Kərimli əlavə edir ki, Dövlət Neft Fondu (DNF) öz vəsaitlərini 1,7-2 faizlə xarici idaretməyə verdiyi halda, Azərbaycan bankları mənzil almaq istəyən vətəndaşlara 12 faizlə ipoteka kreditləri verir. Belə bir məntiqin anlaşılmaz olduğunu deyən AXCP sədrinə görə, fondun pullarını xarici idarəetməyə verməkdənsə, yaxşı olar ki, hökumət həmin vəsaiti hansısa faizlə öz vətəndaşlarına təqdim etsin.
«Azadlıq» siyasi blokunun martın 28-də neft gəlirlərinin xərclənməsi məsələsinə həsr etdiyi müzakirələrdə müxalifət partiyalarında təmsil olunan iqtisadçıların fikiri isə ondan ibarət oldu ki, şəffaflığın təmin olunması üçün Dövlət Neft Fondunun Müşahidə Şurasında ictimai təşkilatların nümayəndələri təmsil olunsun.
DNF Mətbuat Xidmətinin rəhbəri Könül Xəlilova isə səslənən bu fikirlərlə razı olmadıqlarını deyir. Onun sözlərinə görə, fonddakı vəsaitin xərclənməsi ilə bağlı bütün məlumatlar vaxtaşırı açıqlanır və internet səhifədə yerləşdirilir. Qaldı ki, Müşahidə Şurasında təmsilçiliyə, burda da ictimaiyyət nümayəndəsi kimi iki milli vəkili fəaliyyət göstərir.
Amma, iqtisadçılar hesab edirlər ki, Müşahidə Şurasında təmsil olunanların hamısı hökumət tərəfindən təyin olunub. Bu baxımdan həmin qurumda qeyri-hökumət təşkilatları və ictimai birliklərin nümayəndələrinin təmsil olunması müsbət addım ola bilər. Bundan başqa iqtisadçılar neft və neft gəlirlərinin idarə olunmasıyla bağlı qanunların qəbul edilməsini də zəruri sayırlar.
